女人不應靠別人給予安全感！缺乏安全感女生的5個自救方法，成為一個自信動人的女生～
男人同女人天生除咗喺生理構造上有分別，心理構造都截然不同，男人係理性嘅，女人係感性嘅，所以女人喺判斷事物嘅時候成日都會依靠自己嘅直覺，總係要求「安全」，只要有啲唔妥，就會產生危機感，失去安全感～不過其實安全感唔應該係由人地比，而係要靠自己取得，今次就教大家5個自救方法啦！
Photo from Pinterest
1. 加強自我察覺性 避免無理取鬧
女仔因為成日缺乏安全感，所以對每件事都好敏感，有時甚至會因此而對伴侶生無緣無故鬧情緒。
Photo from Pinterest
所以，如果你都知自己係個缺乏安全感嘅人，就要時時刻刻提高對自己嘅察覺性，認清自己喺感情方面嘅焦慮，搵出令你焦慮嘅源頭，思考清楚到底係你無理取鬧，定係對方真係有問題呢 ～
Photo from Pinterest
2. 接受自己的情緒
想解決情緒問題，就要先認清自己嘅情緒，先可以喺自己情緒到來嘅時候，提自己保持冷靜，然後搵個時間同伴侶討論你嘅感受，通過理性溝通去處理問題，希望對方可以多加包容，兩個人一齊搵找出呢段關係入面嘅問題並加以解決。
Photo from Pinterest
3. 習慣獨處
當女人缺乏安全感，就好易會對另一半過份依賴，咁樣亦會令對方相當苦惱。所以，缺乏安全感嘅女仔一定要學識習慣獨處，即使伴侶唔喺你身邊，你都會安然自在，而唔係當伴侶一離開，你就左擔心右擔心，又怕對方會偷食、出軌、背叛等等……咁樣辛苦嘅始終係自己～
Photo from Pinterest
4. 將自己變得更好
喺愛情之中缺乏安全感，好大機會係因為你缺乏自信，覺得自己唔夠好，覺得伴侶會拋棄你搵一個比你更好嘅人。既然你成日覺得自己唔夠好，倒不如將自己變成一個更好嘅人？令別人會主動愛你，著緊你，而唔係一味卑微地乞求其他人嘅愛呀！
Photo from Pinterest
5. 強逼學會信任
強逼一個無安全感嘅人去信任係一件好難嘅事，但逼自己改變係人生中必經嘅過程，不帶任何懷疑同伴侶相處，會令你會發現世界變得更簡單，自己都會更舒服～
Photo from Pinterest
而且，要發生嘅事總會發生，即使你一日到黑懷疑、憂慮，都改變唔到啲咩，咁你又何必要難為自己，搞到自己活得咁辛苦呢～
Photo from Pinterest
Text：Girlslike Editorial
Photo Source：Pinterest
