家燕姐《美女廚房》做嘉賓，風趣呆萌令全場笑翻，嘲笑東西難吃卻不知有份試食：吓，我哋要食架咩？

講起家燕姐，真係大人細路嘅回憶，一家大細坐定定睇《皆大歡喜》，聽住「唏呀唏呀唏呀唏～」唱到琅琅上口～一向行親民形象嘅家燕姐深得觀眾喜愛，上星期佢就喺《美女廚房》任嘉賓評判，大走風趣呆萌風格！不時大搞爛gag，令主持人都笑爆咀～

Photo from from Weibo

上星期6《美女廚房》請咗薛家燕、黃智賢、陳煒、杜如風等人做嘉賓評判，今集大搞新意思，以幾位美女學徒擔正做主角，考驗佢哋嘅縫紉技術，而唔係廚藝！見到一班美女學徒非常比心機起雞皮，家燕姐就靈機一觸，爆出一句：「其實起雞皮就唔駛咁樣起法嘅，我唱隻歌啲雞皮咪起！」

講完呢個獨家起雞皮大法之後，就帶領大家高唱：「唏呀唏呀唏呀唏～起雞皮」笑到煒哥見牙唔見眼～

美女學徒有名你叫，「學徒」，個個都整得雞手鴨腳，家燕姐見到佢哋精心炮製嘅雞卷遲遲未落鑊，連肉都看似宗熟透，自言自語笑說：「真係大件事啦！我而家諗起真係要我哋食就好笑！」睇嚟家燕姐未睇過《美女廚房》，唔知道嘉賓係要負責試食架！（笑）

一班主持人聽到之後，即刻回應：「唔好笑架！真係要食架！」見到大家一臉認真解釋畀家燕姐知道節目規則，小編都莫明地跟住大家笑出嚟！

家燕姐完全展現天然呆嘅萌爆表情，露出一臉疑惑嘅樣：仲問大家：「吓，我哋要食㗎咩？」由見到一眾美女學徒嘅手勢「得啖笑」，而家「被通知」要試食，家燕姐心情一定好忐忑～（笑）

之後有一位美女學徒表示自己未試過用醋煮食，覺得醋嘅味道好酸！煒哥聽到就馬上跟家燕姐講：「家燕姐好想要好『孫』～」

家燕姐連忙笑笑口回應：「唉，呢種酸就咪搞啦！」到呢一刻要試食前嘅「臨死掙扎」，再次笑翻眾人！

一眾嘉賓終於要食美女學徒為大家炮製嘅人間美食，不過家燕姐一放入口，就馬上好似觸電一樣咁臉部抽搐，表情似恐怖洋娃娃一樣雙眼開合不一，可愛表情令網民都表示好好笑！

原來係因為食物太酸，家燕姐食落去「酸到連眼都擘唔大。」

呢頭被太酸嘅食物搞到觸電，?頭就另一位美女學徒整嘅食物不夠熟，家燕姐放入口唔夠1秒，就即刻吐出來！

仍然係笑笑口表示：「我無辦法吞落去！」可能平日睇慣專門惡搞嘅主持人吐食物已經見怪不怪，反而為人厚道唔得罪人嘅家燕姐吞都吞唔到，場面好好笑！

食完唔熟嘅食物之後，家燕姐再次發揮其搞爛gag本領，大家見到食物上有條線，就提醒家燕姐，點知，家燕姐就神回：「哦，有線，但我係無線㗎，TVB。」

食完之後，大家就等著家燕姐畀評語，家燕姐縮一縮膊頭笑說：「我都唔識點表達我內心嘅感受～」表情仲要百感交集，超有笑點～

餓了全晚嘅家燕姐，終於都認證一位美女學徒嘅廚藝唔錯，就連煒哥都大讚可以去開餐廳，美女學徒聽到後就撒嬌表示：「我開餐廳你哋一定要嚟捧場！」

家燕姐一邊食就一邊說：「請我哋嚟剪綵，不過要收利是」，之後主持人都笑說：「家燕姐唔好咁市儈啦～家燕姐」

一眾網民睇到家燕姐做嘉賓嘅小片段，都忍唔住留言大讚家燕姐：「家燕姐比主持人好笑好多」、「家燕姐，玩得講得，識營造氣氛，睇到佢更加開心」、「果然係食神」，更有網民笑稱：「不如主持人換家燕姐啦！！！」

Text：Girlslike Editorial

Photo Source：Weibo, Youtube, Instagram