戴眼鏡也可以超美！化出李佳芯、岑麗香、石原聰美的「眼鏡妝」技巧，假素顏讓你美翻天～！

返工要長時間對電腦、望文件，戴con搞到對眼又乾又唔舒服，所以好多女生都會選擇戴眼鏡返工～唔想一戴眼鏡就望落又殘又冇精神？以下呢幾個「眼鏡妝」技巧你一定要知，來戴眼鏡扮假素顏吧～！

1.底妝要夠薄夠貼

戴眼鏡切忌底妝厚，因為眼鏡框同鼻托會容易整到粉底甩到一塊塊，猶如山泥傾瀉般！所以底妝一定要夠薄，上妝前做好保濕（前一晚敷定保濕mask最正），粉底應只上一層，其他部位如黑眼圈、暗瘡印等就改用遮瑕膏重點遮，就加碎粉定妝就可以啦！

2.眼妝只畫幼眼線

戴眼鏡唔應該搽睫毛膏同眼影，因為會同眼鏡形成強烈反差，整體感覺好奇怪！想望落自然根據眼形只畫一條幼細眼線就OK，會有自然放大眼睛嘅效果～！

3.唇色要自然粉紅色

戴眼鏡但配血盆大口實在太違和啦！應該揀自然嘅粉紅色唇膏，有變色潤唇膏當然最好，營造水嫩嘅粉紅唇色，望落成個人立即精神晒！

4.胭脂選淺粉、範圍要較大

由於眼鏡會遮擋住臉頰位置，所以胭脂範圍搽得太細就會被遮住，容易令臉色蒼白！所以胭脂嘅塗抺範圍要較大，顏色要揀自然嘅粉紅色，並且忌落手太重！

5.眉型要柔和自然

由於眼鏡框已代替眉毛喺臉上嘅作用，眉型應著重自然同柔和，盡量用啡色同灰色等較淺色嘅眉筆畫，眉型亦應避免起角起得太勁～

Text：Girlslike Editorial

Photo source：Instagram