秦嵐至愛栗子雞腳湯！5位女星最愛的養顏湯水，凍齡美貌靠飲出來～
憑住《延禧攻略》入面「富察皇后」一角紅遍中港台嘅秦嵐，美貌出眾，宜家已經37歲，但仍然保養等好好，身材同樣貌就好似20幾歲嘅少女一樣～最近佢就因為煲湯煲乾水而見報，原來佢好鐘意熬美容湯，佢仲公開自己養顏湯湯料，各位姊妹不妨偷下師啦！
秦嵐除咗每日一定會食黑芝麻糊滋潤肌膚外，飲湯都係養生指定動作。日前佢喺微博發佈短片，佢揭開煲蓋話：「今天工作時熬了個湯，結果工作時間太久了，揭蓋時發現湯已經沒有了，鍋我對你善良，請問我的湯去哪了？」原來佢煲美容湯煲乾水，不過網友們似乎將焦點放咗喺湯煲入面嘅養顏湯料上！驟眼睇，可以睇到湯料有青蘿蔔、紅蘿蔔、粟米、栗子同埋雞腳，呢款湯具有清熱潤肺、健脾養顏嘅功效，而且豐富有骨膠原，簡單又經濟，大家想自己喺屋企煲都好簡單～其實唔少女星都飲用湯水養生嘅習慣，今次就推介比大家參考下啦！
Photo from 秦嵐@Weibo
# 莫文蔚：蘋果雪梨瘦肉湯
48 歲嘅莫文蔚身材依然keep得好好，而且充滿活力，家傳湯水功不可沒！其實莫爸爸出名廚藝精湛，仲出過書 《給莫文蔚的健美湯飲》 ，集合咗愛女莫文蔚同埋全家人精心炮製近 50 款傳統中式湯飲，例如魚肚瘦肉淮山蟲草湯、西洋菜鴨肫生魚湯首烏茯苓白術雞湯等等，每款都有養生駐顏功效。當中蘋果雪梨瘦肉湯，更係非常適合秋冬飲用，具有生津止渴、清熱解毒同埋潤燥功效。
Photo from mokabyebaby@Instagram
# 張柏芝：木瓜豬?魚湯
啱啱先生完第三胎嘅張柏芝，一向瓜子口面嘅佢原來曾經喺懷孕嘅時候高達 180 磅，不過宜家已經成功修身，除咗平日嘅有運動習慣有幫助外，湯水都有莫大關係。佢平時會自己煲木瓜豬?魚湯，當中嘅木瓜含有豐富維他命 A 同 C，以及具抗氧化功效嘅胡蘿蔔素，可以亮白同埋滋潤皮膚，而木瓜亦有助消化及排便！
Photo from cecilia_cheung_ccfans@Instagram
# 胡定欣：花膠湯
經常為拍戲而捱夜嘅胡定欣，為咗要喺鏡頭前保持住最佳狀態，成日都會去健身房鍛練身體，仲會飲媽媽煲嘅愛心花膠湯，滋潤身心。花膠一向都係女人嘅恩物，唔單止含有豐富嘅膠原蛋白，可以滋陰明目，令皮膚更有彈性同光澤，加上屬於高蛋白質低脂肪嘅食品，多食都唔怕會肥。
Photo from §nwuuu@Instagram
# 吳雨霏：椰子煲雞湯
上年一索得子嘅潮媽吳雨霏，近日就開始復工，身形仲係同產前一樣窈窕，令人羨慕～早前佢喺 Instagram 上載自己煮拿手椰子煲雞湯嘅影片，呢款湯水對養顏有好大功效，因為椰肉味甘性平，可以補益脾胃、益氣養血，配雞肉煲湯，對手腳寒冷、月經不調、貧血女人問題等有唔錯嘅食療作用。
Photo from ngk@Instagram
Text：GirlsLike Editorial
Photo Source：Instagram，Weibo
