冬天緊身長袖衫更顯肥！9式瘦身操塑造優美手臂線條，消除蝴蝶袖、副乳～
唔經唔覺，夏天已經過去，嚟到初秋季節，好多女仔都開始換上秋裝，不過唔好以為減肥大計可以暫時告一段落呀～秋冬為咗唔想顯得臃腫，好多女仔都會選擇貼身一啲嘅長袖針織衫，不過緊身長袖上衣反而會令你嘅贅肉嘅手臂更顯蝴蝶袖同埋副乳，今次小編就同大家分享9式瘦身操，塑造纖幼嘅手臂線條啦！
#01 手臂360度環繞
首先雙手向左右兩邊伸直，掌心握拳朝下，然後向前打圈20下，然後再向後打圓20下，過程入面要保持手臂伸直，唔可以中途垂下，打圈嘅範圍亦要維持細幅度～呢個動作可以有助活動肩膀，同時收緊手臂線條。
#02 向後拉背
首先雙手向左右兩邊伸直，然後向身體後方伸展，同時夾緊肩胛骨，挺胸收腹，重覆10-15下～過程入面，肩膀唔可以向上縮，身體都唔可以向前傾，要保持直立～呢個動作除咗有助修飾手臂線條，都可以訓練背部以及胸部肌肉。
#03 U型手臂上下擺動
首先雙手手臂呈U型嘅姿勢，手肘同埋上手臂成90度彎曲，而肩膀與上手臂就要成水平線，然後將下手臂向前下壓，再向上舉，手肘與上手臂過程中要保持90度，成個動作重覆10次～
#04 向外推手臂
首先身體背靠牆站立，然後胳膊自然彎曲，手臂呈W字型狀態～然後用肩膀發力將手臂向外推，過程入面背部、肩膀以至手臂都要緊貼牆壁，成個動作重覆20次～
#05 站立飛鳥
首先雙手握拳放前方屈曲90度，手肘以及下手臂貼近，上手臂與地面保持平行～然後雙手慢慢向外擴張，直到手臂同肩膀平行，再番去一開始嘅動作，記得向外擴張嘅時候會感受到肩胛骨夾緊，動作要重覆20次～
#06 手臂貼近向上伸
維持番剛才下手臂緊貼嘅起始動作，雙手手掌心合十，然後向上伸展至最高，會感受得到三頭肌向上拉扯，過程入面手臂保持貼近，唔好分開，上下來回為之一組動作，重覆15次～
#07 雙手合十手臂轉動
雙手合十，手肘向左右兩邊打開，然後維持呢個動作逆時針360度打圈轉動手臂，轉動10圈之後，換方向再做一次～
#08 後臂屈伸
為咗加強效果，可以根據個人能力，雙手握住水樽或者啞鈴舉高過頭正上方，雙手貼近耳側，然後靠上手臂發力，下手臂向後彎曲，再向上舉還原起始步，重覆20次～呢個動作可以消減ByeBye肉同埋副乳～
#09 靠牆掌上壓
首先面向牆壁站立，雙手向前伸直貼住牆，並打開兩倍肩寬距離，雙腳再微微踏後一步，令身體呈前傾狀態～之後身體慢慢向前下壓，直至下手臂同埋手肘成90度，手臂彎曲嘅時候記得手肘唔可以垂下，保持水平向外打開，成個動作重覆15次～
而大家可以根據個人能力，將以上動作重覆2至3組，不過記得唔好操之過急，整傷就得不償失啦，希望大家都可以早日練成優雅嘅天鵝臂啦！
Text：Girlslike Editorial
Photo：
