臉上暗瘡位置反映健康!並非所有暗瘡都關熱氣事,對症下藥還原靚靚臉蛋~
好多時臉上都會莫名其妙生咗好多粒粒,有時仲要生埋係同一個位,一發不可收拾,搞到每日都冇心情!明明已經冇打邊爐、冇食BBQ,點解仲會係咁爆?原來唔係所有暗瘡都關熱氣事!暗瘡生長位置可以反映健康狀況,快啲留意下自己邊度出問題啦!
Photo from ig @ roxannetong
1.眉心、額頭
好多人都會眉心、額頭生暗瘡,由其係青春期學生哥,其實眉心、額頭生暗瘡係心火盛、肝火盛,工作大壓力、睡眠質素差可能都係主因。記得要注意睡眠、保持開朗心情,唔好食煎炸食物以及避免劇烈運動~
Photo from ig @ q_gill
2.鼻子
鼻子生暗瘡反映脾胃差、消化系統出現問題,由其係偏食或有食宵夜習慣嘅人特別容易有,飲食應該要清淡,可多吃南瓜、蕃薯清清腸胃,另可以多飲薏米水去濕熱~
Photo from ig @ itstiffanylau
3.面頰
兩面頰同肺、肝有關,如果面頰不斷生暗瘡要避免吸入過量廢氣或二手煙,吸煙者要盡快戒煙!另外夜瞓、吃重口味食物、吸煙、嗜酒或情緒唔穩定等因素都會導致肝臟差~養肝黃金睡眠時間係晚上11-2時,記得唔好太夜訓!另可吃苦瓜、綠豆、五花茶等清鬱熱~
Photo from weibo@陳妍希michelle
4.下巴
下巴生瘡代表腎虛,如果經常飲凍飲或食生冷野,令到腸胃變差,下巴暗瘡就有可能大爆發!另外女性經期前後,導致內分泌失調都有可能會令下巴生暗瘡~可以多吃杞子和粟米等滋陰補腎食物。
Photo from ig @ rainie77
5.腮邊
有啲女仔成塊面好光滑,唯獨係腮邊長滿粒粒,其實腮邊生暗瘡代表肝臟負擔太重,淋巴循環不暢順,可以多做淋巴排毒按摩,最簡單方法係每日塗保養品時係頸部兩則由上而下輕輕按摩,另外要避免暴飲暴食同保持足夠睡眠~
Photo from ig @ judy.kwong
生暗瘡千祈唔好亂飲涼茶!好多人一生暗瘡就胡亂飲廿四味、五花茶,但暗瘡成因有好多,未必每個人都因為熱氣而生暗瘡~故亂飲用涼茶可能會飲到身體愈來愈寒,隨時搞到虛過以前,有機會令暗瘡問題更難根治!如果暗瘡問題嚴重緊記請教專業醫生,另外培養好基本健康習慣,少熬夜、飲食清淡而均衡,已經踏出左一大步了!
Text:TopBeauty Editorial
Photo source:Instagram