女生都容易有焦慮症！5個小習慣培養淡定心境，學會清除心靈戾氣，勿讓焦慮感侵蝕自己～

By Michelle on 14 May 2019

Digital Editor

逆境力高嘅人唔單止於焦慮時有應對方法，同時都有一個穩定嘅心，唔會因為小事影響情緒。如果自問係焦慮體質，小事情都令到自己氣憤難平、長期焦躁感令到你覺得生活過得唔好嘅時候，養成以下5個心靈習慣，可以幫你擺脫焦慮體質，學會清除心靈戾氣，保持愉快心情先會擁有幸福生活～

＃1 心情唔好時，就唔好回望過去

身邊有無一位朋友，成日都滿腹牢騷，記住一啲明明好瑣碎嘅小事，令到自己成日都唔開心、提不起勁。由於經常回望過去唔開心事情嘅關係，心中積滿討厭嘅遭遇，變成一位愛抱怨嘅人而不自知。

Photo from aliaime @ ig

心理學證實記憶跟情緒有好深入嘅連結。當一個人心情不好，就好容易注意到事情差嘅一面，亦更留意到過往唔開心嘅負面經經驗。想擺脫焦慮體質，就要避免喺自己心情唔好時回望過去。嘗試一下回想以前快樂嘅回憶同開心嘅經歷吧～

Photo from aliaime @ ig

＃2 少提及自己嘅負面回憶

逆境力高嘅人通常唔會事無大小都提及自己嘅負面回憶，佢哋會用呢個方式掌控自己嘅心情起跌，有效減低焦慮感。原理就係當人提及不快經歷時，隨住「放負」時間愈長，負面情緒反而唔會有減輕跡象，反而會不斷膨脹。一旦唔再控制情緒氾濫，負面情緒分分鐘會潰堤！當然，每人都有憤怒、唔開心嘅時刻，內心有相關感受都係唔可以阻止嘅事，但好好控制「放負」，停止抱怨，你一定可以掌控自己嘅人生同焦慮感。

Photo from wongtsuiyu @ ig

＃3 積極面對問題

逆境力高嘅人即使處身不利情況，都會以正面積極嘅心態去面對難題，勇往直前係可正面嘅應對方法。相反，逆境力低嘅人只會以負面態度應對問題，自然會令情緒不穩，造成焦慮體質。比如，面對難熬日子唔好不停埋怨，從另一個角度諗「只要捱過呢一關就可以破繭重生」；遇到麻煩同事，唔好動氣去諗點解對方咁樣為難你，平靜去接受「睇嚟我哋真係唔太夾呢」就此作罷。凡事都可以用平常心去看待問題，只要識得養成咁嘅習慣，就可以擁有堅強穩定嘅內心，女生好好掌握自己嘅人生吧～

Photo from vvyeo @ ig

＃4 消除自卑感

「把口生喺人哋到，人哋點講你都未必控制到」如果憑事都因為別人嘅說話而令自己動怒，歸根究底都係接受唔到自己係唔完美，產生嘅自卑感令你有反擊嘅意欲。當一個人有自卑感，只要別人稍微踩到佢嘅「要害處」，都會令佢產生強烈嘅情緒反應。所謂人無完人、事無完美，要明白每個人都有不足之處，唯有坦然接受自己嘅缺點，減少自卑感，先可以擁有健康心靈。

Photo from aliaime @ ig

＃5 以「點樣去處理」取代「點解會咁」

「點解會咁？」係最令人感到焦慮嘅諗法類型—「點解佢會咁樣講？」、「點解我會做得咁慢？」、「點解會又做錯？」......如果所有發生喺自己身上嘅事，我哋都用「點解」角度去不停考究，唔單止對問題無建設性，仲會增加自己嘅焦慮感。咩野先叫有「建設性」又可以減低焦慮嘅思考模式，方法只要將「點解」轉換成「應該點樣去處理」就可以～唔好不停質疑自己「點解自己做嘢咁慢」；而係花心思研究「點樣可以提升效率。」