瘦面、去皺、去眼圈的萬能針？！拆解中醫美容新趨勢「美人針」

By laam on 07 Jun 2019

隨住科技愈來愈進步，女生們令自己變美嘅方法愈來愈多，已經唔單單局限於搽護膚品、高能量儀器，甚至去到一啲入侵性嘅手術。不過近年亦興起回歸自然嘅方法，以中醫傳統手法去達至美容美體效果！今次就請嚟註冊中醫師梁慧儀去講解一下「美人針」（面部針灸）有咩特別同用處啦！

其實中醫美容已經出現多時，但最初偏向用針灸治療一啲損容性疾病同皮膚問題，近年衍生至能夠改善皺紋、包包面、黑眼圈等嘅美容項目。而今次介紹嘅美人針就係比較常用嘅手法，同樣以針灸手法，透過刺激面部唔同嘅穴位，可以加強面部氣血循環，改善皮膚暗黃同粗糙感。針對相應部位，亦可以改善眼周氣血流動，減淡眼部疲倦感、浮腫、皺紋同黑眼圈嘅情況，另外唔少女生關心嘅包包面問題，亦可以美人針去提升面部輪廓，去水腫同改善面部不對稱嘅問題。

大家可能會諗「針喎！？用係面度喎，會唔會好危險架！」先講解一下美人針所用嘅針同普遍針灸針有咩分別。美人針所用嘅針非常幼細同手工精細，只有0.12mm嘅粗度，同平時身體痛症用嘅針（0.35mm）相差三倍。針落去嘅時候唔會刺激到微絲血管，感覺不大。與此同時，每支針灸針都有針管包覆住，醫師扎針時除咗可以防止扎針偏離穴位，手指亦都唔會觸碰到針身，比起一般針灸針甚至係埋線同高能量儀器更加安全、衛生同方便！

整個針灸過程非常簡單，醫師會先幫美容者消毒面部，將管針固定係面部穴位上，然後將針帶入肌內層適當嘅厚度，稱之為「入針」。大約維持20至30分鐘，就可以起針。針灸嘅時候會感覺到面部有拉扯嘅感覺，一星期進行一次，大概5至10次就會有比較明顯嘅功效。

其實面部針灸唔單止係香港會用到，日本都有相類似嘅「美容鍼」，同樣有改善膚質同拉提嘅作用，但日本嘅美容鍼好多時候都會用到電針，將針灸針接駁電源，以電流加強刺激神經嘅方向。但傳統中醫學上，針灸有「捻、轉、提、插」嘅手法，當中亦對肌肉厚度相當講究，由此借用醫師嘅手去傳遞「經氣」至穴位，咁樣會俾硬性嘅電針刺激更嚟得有效！