遊日藥妝掃不完！CP值滿點美妝新品大放送～人氣眼影、睫毛膏、唇膏都在這裡

By laam on 12 Jul 2019

日本藥妝店對女生嚟講簡直係一個令人迷失自我嘅聖地，每次入到去無返三五七個鐘都走唔返出嚟，誓要買到失心瘋為止！除咗以往唔少網站、Youtuber推介嘅人氣產品之外，仲有好多新品陸續推出，今次就睇下暑假有邊啲好物值得留意啦～

Photo from Lipcosme

MAJOLICA MAJORCA

Photo from Lipcosme

一個好熟悉又令人懷念嘅名字～因為MJ已經係去年年尾撒出咗香港喇！無論佢嘅眼線定睫毛膏嘅評價都極高，係香港買唔到唔緊要，去日本一定要買返夠本～講返近期MJ嘅新品，就係呢兩支同迪士尼《Alice in the wonderland》合作聯乘嘅限量版睫毛膏，分別係濃密型（愛麗絲）同纖長型（妙妙貓），前者係纖維刷頭，後者係梳型刷頭，造出兩種濃密纖長兩種效果！

Photo from Lipcosme

MJ嘅睫毛膏都多次係美妝公信力網站攞獎，極黑嘅纖維唔止令眼睛睇落去更加有神，亦做到根根分明，卷翹效果可以保持一整日，最緊要佢防汗抗油脂能力極強，唔會咁容易變熊貓眼！去到日本一定要入返多啲囤貨啊！

Cezanne

Photo from Lipcosme

被網民譽為神級化妝品嘅Cezanne即將係16嘅推出新嘅限定光影粉#02香檳玫瑰色！！淡淡而且幼細嘅珠光令皮膚充足氣質嘅光澤感～無論上班定約會用都咁適合！而光影粉加入大量保濕成份，搽上面避免令容妝出現浮粉，唔會影響個底妝！而品牌另一個皇牌產品單色粉花胭脂都會係9月推出全新色調，真係好令人期待啊！

CANMAKE

Photo from Lipcosme

趁日圓未高企，又見到有新品大家總會想快人一步忍唔住入手！近期CANMAKE都有品少新品，就好似皇牌產品Prefect Stylist Eyes五色眼影又加入兩位成員，包括#19 Urban Copper同#20 Shiny Sea glass，#19係粉嫩嘅玫瑰粉紅加上銅啡色，非常百搭，而#20 就係淡淡嘅海水藍色做主打都好有夏日活潑嘅感覺～一盒可以有多種變化，而售價都係￥780，即係港幣$56，唔買真係對唔住自已！

Photo from Lipcosme

另外亦有一款新品極之吸引，就係Jewelry Shadow Veil眼影組，一盒有兩格雖然係同顏色，但分開兩種大小不一嘅顆粒質感，啱晒喜歡Bling Bling閃爍眼妝嘅朋友，而新推出嘅色調#04 Aqua Suga冰藍色，俾人一種冰冰涼涼嘅感覺～

Photo from Lipcosme

唔止眼影，新鮮滾熱辣嘅仲有今日推出嘅限定品Quick Lash Curler Remover，同睫毛膏設計一樣，沾滿溶解劑一掃就可以卸除睫毛膏，非常方便，去旅行必備嘅小幫手！

Integrate

Photo from Lipcosme

又係一個撤出香港但好好用嘅品牌！眼影、心心粉餅固然係Must buy item，但近期最新推出嘅底霜Air Feel Maker都有唔錯嘅評價，新色號#Lemon同#Mint，黃色可以調整黑眼圈同雀斑，而綠色就可以去除泛紅感。呢支底霜質感非常輕盈，好似慕絲咁幼滑～而且可以遮蓋毛孔，效果透薄自然！都係￥900一支咋～

Opera

Photo from Lipcosme

近年唇膏界人氣急升！每每推出新色，日本女生都會瘋狂搶購，可以話係CP值爆分嘅唇膏～新推出有三個系列六款唇膏，包括滿滿幻彩光澤嘅Light Prism限定色#101 Lucent Pink同#102Shimmering Beige，Lip Tint 嘅#05 Coral Pink同#08 Burgundy，Sheer Lip Color嘅#05 Shimmering Pink同#10 Burgundy，滋潤嘅質感就算唔搽潤唇膏都無問題，而且顏色自然透亮，係氣質女生嘅首選！