選錯枕頭會有雙下巴！日專家：枕頭太高太軟也不行～雙下巴與肥瘦沒有必然關係！

By laam on 12 Aug 2019

肚腩大可以靠著衫遮下啲肥肉，塊面有瑕疵都可以用化妝品修飾一下，唯獨是雙下巴無得遮！！仲會令你望落有視覺錯覺更顯肥顯老～但雙下巴嘅出現同肥瘦無必然關係，即使身材瘦削嘅人都有機會有雙下巴，日本專家就指出原來揀錯枕頭都有機會令你有雙下巴架！

Photo from Pinterest

日本東京大學理學療法師竹井仁教授表示，選擇枕頭嘅柔軟度同高度都有機會增加雙下巴出現嘅機率。瞓落柔軟嘅枕頭聽到都覺得好舒服，不過過於柔軟會容易令人陷入枕頭，以至下巴連接頸部嘅筋膜長時間拉扯，久而久之就會令到筋膜失去彈性同鬆弛，雙下巴就係咗嚟喇！

Photo from Pinterest

而另一個原因同高度有關，枕頭過高會使呼吸道有機會受壓，令血液同淋巴循環系統受影響，出現水腫問題，時間耐咗仲會造成下垂添！

Photo from Pinterest

改善嘅方法當然係用啱嘅枕頭啦～教授就建議將一條毛巾對摺兩次，另外再將三條毛巾各對摺一次再疊起，大約呢個高度就會係枕頭嘅最適高度喇～除咗注意枕頭高度之外，想踢走雙下巴都有唔同嘅方法，竹井仁教授就教大家可以將雙手舉高放係後腦位置，下巴盡量緊貼胸口或鎖骨，維持呢個動作5秒，一日做三次大概兩星期度雙下巴嘅情況就會有改善！