【不同睡姿的優缺點】研究：仰臥放鬆全身但增加睡眠窒息風險！你是仰、側、俯？睡姿透露健康危機～

相信每個女生都有「瞓教小癖好」，例如係攬住枕頭角入睡、要指定香氣嘅被氈、無論春夏秋冬都想蓋上厚厚嘅綿被，各種「小癖好」無非係想追求安全感。關於睡姿習慣，你以為只係關乎安全感？原來呢種個人喜好對健康影響都好大架～

Photo from wongmanyik @ ig

根據英國《每日郵報》刊登關於睡姿影響健康嘅研究，研究發現唔同睡姿都各有優點、缺點！

＃1 仰臥—放鬆全身、避免皺紋

傳統大字形仰臥姿勢可以令全身放鬆，減低對頸部同脊部造成嘅壓力所引起嘅酸痛。習慣仰臥嘅女生，都可以避免因為長時間跟寢具磨擦而於臉上形成皺紋，另外亦會減少因為寢具唔乾淨同埋出汗而堵塞毛孔引發暗瘡，可以話係一個「美容睡姿」。雖然仰臥有好處，但同時都因為地心吸力，令舌頭倒向喉嚨，會引起嚴重鼻鼾，甚至增加睡眠窒息風險！如果你習慣仰臥，但瞓醒後不時發現肩臂酸軟，有可能係雙手放錯位置，最好嘅做法係垂直放喺身體兩側，或者放喺耳邊，呈現投降嘅姿勢，千萬唔好將雙手放高於頭部、胸口、或者肚上，令肩臂繃緊。

Photo from natalietong53 ＠ ig

＃2 側睡— 降血壓、改善消化

對唔少人嚟講，側睡係個最有安全感嘅姿勢，但因為身體長時間側向一邊，令半邊身長期受重，手臂同雙腿都會因為過度受壓造成慢性痛症。小提示：左側臥時，左手放喺身體左側，右手可以橫放；右側臥時即反之。要汪意嘅係，避免將雙手放喺枕頭下，因為雙手受壓會壓迫神經血管，影響血液循環。除此之外，其實側睡好處多多！左側睡時，內臟嘅排列位置可以有效減少胃酸倒流，如果胃部經常有灼熱問題嘅人，左側睡就可以減輕症狀，有助改善消化系統；而右側睡時，就可以減少心臟受壓，有效降低血壓同心率。

Photo from yuenkaka ＠ ig

＃3 俯睡 —最唔健康

俯睡係最唔健康嘅睡姿！因為當我哋俯臥時，身體會直接壓住心臟、肺同胃，令呼吸變困難，特別對於有心臟病、高血壓嘅人，就更加唔應該俯睡。俯睡時，為咗維持正常呼吸，我哋會擰轉頸部呈90度轉頭姿勢，咁樣都會導致頸部勞損，影響脊椎，引起腰背痛。另外，俯睡跟仰臥相反，頸部嘅90度轉幅，再加上面部會直接壓於寢具上，會形成大大小小嘅頸紋同皺紋，女生想要瞓「美容覺」就唔好用俯睡嘅睡姿了～

Photo from from Pinterest

Text：Girlslike Editorial

Photo source：Pinterest, Instagram