秋風送爽去郊遊！女生必學行山、野餐心機「素肌妝容」，不要做嚇人濃妝寶～

By Michelle on 15 Oct 2018

Digital Editor

踏入秋冬，又到跟男朋友、閨蜜郊遊野餐嘅季節。每次去郊外地方，你都想將妝容化得簡單一啲，但殘樣又令你不自覺將妝容愈疊愈厚，結果濃妝艷抹除咗跟大自然風唔夾外，仲畀男朋友、閨蜜笑你「粉人」，結論係都係換上一張清新嘅「素透肌」會比較適合吧～但又有邊個勇士夠膽「素顏」跟男朋友、閨蜜約會？學識以下3點「小心機貼士」，下次有郊外活動就化一個「素透肌妝容」，望落去精神一啲又平易近人，影相就唔怕變「濃妝粉人」了～

Photo from fukishalj ＠ ig

貼士1：底妝

放棄用粉底液同cc cream，如果皮膚唔算極乾肌，就要避免選擇濕潤感重、光澤感強嘅底妝，太高遮瑕度嘅濕粉，佢哋妝感雖然高貴，但喺陽光底下只會跟你一身運動輕便look 格格不入。如果皮膚較紅，或者膚色不均嘅女生，可以先用調色底霜打底﹐將紅印、黃氣去除大半，再以有色防曬作為你嘅「粉底」。瑕疵較多嘅女生，可以另外再上遮瑕膏，以打造乾淨、精神嘅臉容。

Photo from aragakiyui_fanspage @ ig

貼士2：胭脂

即使你平日喜歡搽紅噹噹胭脂，郊遊時就切勿選用有閃粉嘅胭脂。因為你要打造的是健康、乾淨的臉，而唔係花巧，華麗嘅妝容！以胭脂水代替粉狀胭脂，可以令紅潤感由底層肌膚透出來，而唔係「死實實」有層粉係皮膚上。記得因為你無搽粉底嘅關係，過紅、過橙嘅胭脂有機會喺近乎「素臉」上變得浮誇，乖乖地選擇氣色感重嘅胭脂，打造自然的白裡透紅感覺，再用透明碎粉定妝就ok～

Photo from aragakiyui_fanspage @ ig

貼士3：眼妝

與其話眼睛係靈魂之窗，其實眉係更重要的一個部份！「無眉娘」睇起來無精神又老了幾年，所以花多啲時間晝一條角度唔強，「自然系」眉型好重要～放棄搽眼影關係，無論係野餐定行山，粗粗嘅眼線都肯定唔適合素眼，但要放大眼睛同樣有法！只要喺睫毛上落多啲功夫，細心咁將睫毛夾翹，塗上纖長型睫毛液，炯炯有神話都無咁易！如果野餐要影「網紅相」嘅你實在好想化個靚眼妝，小編都只會建議你用珊瑚色眼影掃上眼蓋，有「掃走倦容」之效，再用帶有珠光嘅裸粉色掃喺眼頭位置提亮，令雙眼望落可以深邃一啲又未至於畀人覺得你濃妝～

Photo from @stella16wong @ig

貼士4：唇妝

女生屋企總有一千幾百枝唇膏，到底點選擇？秘訣就係千萬唔好用濕潤感重，令立立嘅唇彩，就連透明唇彩都唔好用，因為望落去好礙眼，一睇就知你化咗唇妝。所謂mlbb （my lips but better ），最自然的唇妝就係將唇膏化成自己唇色一樣，改善色素不均、唇邊、咀角有色素沉澱嘅問題。選擇一款貼近自己唇色嘅唇膏，然後塗喺唇部中央位置，慢慢印開。試問邊個女生天生可以好似搽咗實色唇膏咁，兩片唇都係粉紅而且實色？所以用「印開」嘅方法，望落去顏色唔會過實，少少漸變嘅效果感覺更自然。