一年減走20公斤！女大學生減肥不反彈心得公開，減脂、皮膚變好全靠一個小秘訣～

By Aisa on 01 Feb 2019

一個追逐夢想的女生，深信未來是屬於相信心中美夢的人。

好多人女仔都會因為人地一句說話去減肥～內地就有一個女大學生旅行嘅時候，被一個阿姨問係咪懷孕，佢為咗唔想再有咁樣嘅事發生，就下定決心狠狠減肥！結果用咗一年時間就減走咗20kg，仲公開分享咗唔反彈嘅減肥攻略，佢話減脂、皮膚變好都係全靠一個小秘訣！

內地一位女生大學生（娃娃），小學六年級畢業之後，就因為青春期荷爾蒙不穩定而暴肥，整個中學時期都無瘦過，長期處於60kg。之後佢去咗美國讀書，體重更升到71kg！

人生首次踏入71kg，嚇得娃娃即刻話要減肥，加上有一次佢去馬來西亞，有一位當地阿姨問佢：「Are you pregnant?（你懷孕了嗎？）」當時佢完全唔知道要點答呢個問題，就因為咁佢立下決心減肥～

嗰一年嘅新年，佢就開始減肥，最開始佢每隔一日就去做一次gym，每次做45分鐘有氧運動，每日控制熱量攝入。佢鼓勵網民唔好被剛開始嘅辛酸嚇怕而放棄，佢當初連一個掌上壓都做唔到，70幾kg體重嘅根本無辦法跑步超過二十分鐘，但慢慢堅持就會成功！

三個月之後，娃娃就瘦咗10公斤，因為體重之後都唔係跌得好明顯，於是佢就開始請私人教練，做TRX、腹同埋臀嘅訓練等等。暑假過完準備要番去紐約之前，佢成功再瘦多2.5公斤，體脂由之前嘅30%降到27%。差唔多一年之後，佢嘅體重降到55公斤，體脂為22%，而且仲有馬甲線，宜家嘅體重就一直維持喺50公斤左右。