運動後唔食嘢可能會仲肥!運動前後要吃什麼?吃錯了運動等於白做~

運動後唔食嘢可能會仲肥!運動前後要吃什麼?吃錯了運動等於白做~

Diet
By joycecheung on 18 Apr 2019

成日聽人講想減肥一定要做運動,平時行條樓梯都厭辛苦,每次做運動都要有好大決心先做到!咁辛苦做完運動點都要獎勵返自己,仲唔嘆返餐壽司牛扒加珍奶?等等先!做完運動食呢啲等於白做,隨時仲肥過你唔做運動!有人話「減肥三分靠運動,七分靠飲食」,運動前後食得啱能夠讓你辛苦付出嘅汗水更事半功倍!

Photo from ig @ Judy.kwong

運動前吃什麼?

有時放工打算做一兩個鐘頭gym,但收工太晏冇時間食飯,諗住做完先食得豐富啲~如果你有呢個習慣要立即戒掉!運動會消耗熱量,如果空肚做運動會有機會血糖低見頭暈,所以運動前一定要進食!

運動前數小時可以食得豐富啲,補充足夠碳水化合物、蛋白質、脂肪,例如雞肉飯配蔬菜~如果想減肥效果更顯著,建議選擇低升糖指數(GI)嘅主食,例如糙米、意粉、裸麥粒麵包等~

Photo from ig @ wongmanyik

運動前1小時內都可以進食偏流質碳水化合物及蛋白質,避免運動時胃部不適,建議食物有無糖希臘乳酪、水果如香蕉、蘋果等~但記住進食後至少30分鐘先好做劇烈運動呀!

Photo from ig @ Judy.kwong

運動中吃什麼?

運動中會流失大量水份,建議每運動10至20分鐘補充200-300ml水分~如果運動前真係無時間進食,中途覺得肚餓,可以補充高升糖指數(GI)食物,例如係全熟香蕉,加快體內血糖上升~

Photo from ig @ wongtsuiyu

運動後吃什麼?

好多人以為運動後唔食嘢會好快瘦,但其實運動中消耗好多能量,包含血糖及胺基酸,運動後正正係最需要進食嘅時候!如果晚上運動後完全唔進食,等到第二朝先食早餐,咁樣對身體修復以及新陳代謝都有唔好嘅影響~短期內雖然會瘦,但好快會反彈,而且會容易疲累、面色變差~

Photo from ig @ nwuuu

運動後建議補充水份、少量碳水化合物及蛋白質,碳水化合物可以維持血液中的血糖,蛋白質有助肌肉蛋白合成,修補因運動受到破壞嘅肌肉組織~甚至可提升代謝率,加速脂肪消耗!建議食物有吞拿魚麥包三文治、雞肉配焗薯、無糖豆漿配水果、水果配烚雞蛋等等~!

Photo from ig @ rainie77

 

Text:TopBeauty Editorial

Photo source:Instagram

 

 

【看更多OL專屬最新美容時尚資訊】

👉🏻 立即Follow Instagram topbeautyhk

🔔 訂閱我們的 Youtube 頻道 TopBeauty HK