發抖10分鐘等於運動1個鐘！研究發現：冬天著少啲可以有助減肥～

最近天氣凍咗唔少，搞到大家都要急急腳拎番啲冬天衫出嚟著～相信對於唔少女仔嚟講，冬天係一個令人又愛又恨嘅季節，雖然呢個季節可以出動靚靚嘅大褸，而且又有聖誕節等節日，感覺浪漫有氣氛，不過太凍嘅時候，真係會令人唔想郁，又忍唔住口狂食野，唔經唔覺就肥咗一個碼啦～

Photo from Pinterest

即使天氣咁凍，街上都仲會有好多「愛靚唔愛命」嘅女仔，著短裙、絲襪完全唔怕凍，不過唔講唔知，有研究指原來冬天著少啲可以減肥， 原來平時街上啲靚女著咁少係為咗偷偷減肥！如果真係穿得少，又可以靚又可以減肥，咁小編我都只好加入大隊啦～（笑）

Photo from Pinterest

澳洲有研究發現，寒冷天氣有助人體燃燒體內嘅脂肪。喺低溫15度以下，人體喺凍到打冷震嘅時候，肌肉組織會釋放「鳶尾素」同埋 FGF21 兩種可以消耗囤積脂肪嘅荷爾蒙，呢個時候 10 分鐘所燃燒嘅脂肪甚至相等於運動 1 小時～雖然聽落好似自虐咁，不過好似又幾抵諗啵～

Photo from Pinterest

人體脂肪分為啡色脂肪同埋白色脂肪兩種，啡色脂肪裡面含有一種物質，可以有助分解致肥嘅元兇 - 白色脂肪～而低溫之下，有助活化啡色脂肪同埋促進啡色脂肪形成，所以當體內嘅啡色脂肪含量上升，致肥嘅白色脂肪就自然可以更快速地被分解啦！

Photo from Pinterest

Obesity 雜誌曾經刊登過一項日本研究，邀請咗13位年齡介乎20至28歲嘅男性，測驗要求佢地只係著單薄嘅衣服，喺 19℃ 低溫下逗留兩小時，結果發現比起穿著足夠保暖衣物嘅人，佢地啡色脂肪更能呈現活化現象，比正常人額外燃燒多410 kcal，升幅達3成以上～

Photo from Pinterest

意思就係話，如果你想減肥成功，最好就係將體內嘅白色脂肪「棕色化」！日內瓦大學（University of Geneva）早前發表過一項以老鼠為測驗對象嘅研究，研究將老鼠放入只有攝氏6度嘅環境10日，結果發現老鼠體內嘅白色脂肪會棕化，而且燃燒脂肪嘅速度都會加強～

Photo from Pinterest

咁聽落著少啲好似真係可以有助燃燒脂肪，不過小編覺得大家都係量力而為，如果到時因為無著夠衫凍親，就慘啦～所以計我話，都係乖乖地做運動減肥啦（哭）～

Photo from Pinterest

Text: GirlsLike editorial
Photo Source: Pinterest
Source: abcnews